काठमाडौं, २२ कात्तिक । आम जनता पार्टीका अध्यक्ष तथा पूर्वमन्त्री प्रभु साहले दीपावली, नेपाल संवत् र छठ पर्वले हरेक नेपालीलाई अन्धकारविरुद्ध लड्ने शक्ति प्रदान गर्न सकोस् भन्ने कामना गरेका छन्। आइतबार चाडपर्वलक्षित भिडियो सन्देश जारी गर्दै अध्यक्ष साहले यस्तो कामना गरेका हुन्। उनले अहिले देशमा छद्मभेषी माहोल रहेको बताए।
उनले भने, ‘सत्य दबेको छ र असत्य हाबी छ। भ्रष्टहरूले सुशासनको मुकुण्डो लगाएका छन्, दलालहरू राष्ट्रियताको पाठ पढाइरहेका छन् र विध्वंस मच्चाउनेहरू विकासका कुरा गरिरहेका छन्। यस्तो भ्रमपूर्ण अवस्थामा यी महान् पर्वहरूले हरेक नेपालीलाई अन्धकारविरुद्ध लड्ने शक्ति प्रदान गरून्। देश सुख, शान्ति र समृद्धिको मार्गमा अग्रसर होस् भन्ने हार्दिक शुभकामना व्यक्त गर्दछु। तपाईं सबैको मनोकामना पूरा होस्। पुनः मंगलमय शुभकामना। धन्यवाद !’
अध्यक्ष साहले दीपावली आफैँमा उज्यालोको पर्व भएकाले सबै नेपालीलाई अन्धकारविरुद्ध लड्ने शक्ति प्रदान गर्दै सिंगो देश उज्यालोको बाटोमा अगाडि बढिरहोस् भन्ने कामना गरेका छन्। सन्देशमा साहले भनेका छन्, ‘हाम्रो महान् पर्व शुभ दीपावली, तिहार, नेपाल संवत् ११४७ तथा छठ पर्वको पावन अवसरमा म सर्वप्रथम यहाँहरू सबैमा हार्दिक मंगलमय शुभकामना व्यक्त गर्दछु।
प्रकाशको महापर्व शुभ दीपावलीले हरेक नेपालीलाई अन्धकारविरुद्ध लड्ने शक्ति प्रदान गरोस् र सिंगो देश उज्यालोको बाटोमा अगाडि बढिरहोस् भन्ने कामना गर्दछु।’ यस्तै, उनले नेपाल संवत्लाई मानवता र परोपकारको गौरवशाली इतिहास बोकेको पर्वका रूपमा उल्लेख गर्दै यस पर्वले पूरै विश्वलाई सधैँ मानव कल्याणको बाटो देखाइरहोस् भन्ने शुभेच्छासहित यसका प्रणेता शङ्खधर साख्वाप्रति हार्दिक श्रद्धासुमन व्यक्त गरेका छन्।
आस्थाको महापर्व छठले प्रकृतिप्रतिको उच्च सम्मानलाई स्थापित गरेको उल्लेख गर्दै साहले आरोग्यकी देवी छठीमाताले समाजमा सधैँ सत्य, शान्ति र सद्भाव कायम गर्ने शक्ति प्रदान गरून् भन्ने शुभकामना व्यक्त गरेका छन्।
